قصیدة: [ ضوى سنيني ]
المستهل:
یالماخذ نظر عیني
لاتدفن ضوه اسنیني
گلبي امن الألم صاح
بویه علي بویه
الماتت أمه گدامه
اللّه ایساعد أیامه
اشلون ابدنیه یرتاح
بویه علي بویه
-------------------
۱/
بویه سولف یا علي روحي ماردت إلي
ماردت اویاك مانعها التراب
أمي مو مالت دفن ورده و انت الها غصن
مشترکه بالروح وضّح لي الأسباب
لیش أمي من دون البشر ماعبرت اثمنطعش
ابستان کون الورد مو حلوه ورده ابنعش
راحت زهرة أیامي بالباب الضلع دامي
خدها ابچفهم انلاح بویه علي بویه
سطرة أمي تاذیني منها زاید اونیني
گلبي امن الألم صاح بویه علي بویه
-------------------
۲/
شنهو ذنبي امن الزغر اتیتّمت باقي العمر
من عملة الباب أفگدها الأیام
عمري خمس اسنین أظن و آنه ادري الأم وطن
و اتقَدر الإحساس لو تنشد أیتام
بس الفگد أم ینسئل و اتجاوب ادموعه
نوح المفارگ ینسمع لو سولف ابلوعه
عالخد سولفت دمعه صوتچ محد ایسمعه
دمع اللي یسولف للألم راح بویه علي بویه
أشتاگ لنظر عینچ اشلونه الفارگ اسنینچ
گلبي امن الألم صاح بویه علي بویه
--------------------
۳/
بغیمه جفني ماصحه أبچي لو شفت الرحل
و أتمنی ویاي من وحشة الدار
حالي بعدچ چن شمع تبچي بس ماتنسمع
من یگبل اللیل ایخلیني أحتار
محتاره یم لیلي الصبر مثلچ شمع ذایبه
یعگوب ما عاش العمر لو مارجع غایبه
غابت فرحتي عني ماخذها الأجل مني
دمعي اعلی الوجن طاح بویه علي بویه
ماترهم بعد جیّه اسئل حزني یومیه
گلبي امن الألم صاح بویه علي بویه
--------------------
٤/
ابجرحي متواعد زمن الباب و الخیمه التقن
ما ادري بالنار من تکبر اویاي
اهنا شفت ضلعي انکسر اهناك سالفتي نهر
و امعاتب اچفوف ما رادن الماي
من بابچ و طف کربلا لو سولفت عن خدر
للخیمه هم یکسر ضلع دافعها چف الشمر
الما محسوبه من دیني لیش احباله تاذیني
چفي امن الحبل ناح بویه علي بویه
ناري و بابي و البیها یم الکافل أحچیها
گلبي امن الألم صاح بویه علي بویه
--------------------
۵/
راح أضم باب الألم لجیّتك راعي العَلَم
و أشکي لك اشصار من ذیچ الچفوف
یُمه خَیّچ لو سئل گبري وین ابیا محل
خل یسئل الباب و ابعتبته ایشوف
من یسئل الباب ابدمع عَبّاس ابن فَاطِمَه
ضمیته لأیام الضمه مثل المطر بالسمه
یا غیمة عطش روحي هاك اسمعهن اجروحي
تلچم بیه الجراح بویه علي بویه
روحه تشرگ ابهمي أمه فاطمه و أمي
گلبي امن الألم صاح بویه علي بویه
---------------------
🖋الشاعر: مصطفی العیساوي
تعليقات
إرسال تعليق