اجمل قصائد حسينية مكتوبة
مرني لو عندك وكت منتظره جيتك
شنهي روحك مادرت تارك ابنيتـــك
من رحت انت وهلي
كتلي اوديلج علــــي
وين وعدك يـــالولي
الواعديته
****************************
مرني طيف ابنص منامي حتى ماعوف المنام
مرني لو نسمة بهوايه محمله اهات وســـــلام
مرني لو لحضه وتعاود اخذ من طبع الـــحمام
مرني بويه بساع لحك ولله كاتلــــني الهيـــام
هي ساعه وروحي تطلع من فركتك
بيه ماذكرتك اختي وحتى اخــــتك
كتلي بويه ادللـــي
كتلي اوديلج عـلي
وين وعدك يالولي
الواعديته
*************************
مرني لو تكدر تجيني حتى لو لحضه وتعـــود
مرني ماساكت ونيني حتى في وقت السجود
مرني غيمه وفوكي تعبر حتى لاحزني يــسود
صبري خلص بنتضارك ممكن بشوفك تــــجود
صارت ايامي بغيابك ترمي لســـهام
كل دقيقه اتمر بدونك تنحسب عام
كلي يمته اترد الي
كتلي اوديلج عـلي
وين وعدك يالــولي
الواعديته
**********************
اصف بحرفين يملك من علم ذاك الكتـــــاب
قبل ليرد رمش عينه للنبي بلقيسه جــــــاب
وانت حاوي العلم كله اشلون ماترد الجواب
ما اريد العرش كله يكفي من جــدمك تراب
ياحسين الدنيا ضلمه بلايا نـورك
وانا شتمنه بحياتي بس حضورك
نار تسعر داخـــلي
كتلي اوديلح عـلي
وين وعدك يالولي
الواعديته
**************************
باهته الدنيا برحيلك مااشاهد بيهه لـــــون
اه يالون السعاده بكلبك الدافي الحنـــــون
اه ياضحكة اعيوني وعكبك اتصب العيون
اه والذيج المحنه الراحت اويه المايــجون
مات كلشي بداخلي بساعة رحيلك
لاتجيني وكلي وين وانا اجيـــــلك
مات كلشي بداخلي
كتلي اوديلج علـــي
وين وعدك يالــولي
الواعديته
**************************
بويه تدري بجسمي عله وهسه زادت علتـــي
فراكم يلزمله حيل وانا ميــــته ابــــــوحدتي
شلون اعيش وانت ماكو خنكه صارت دنيتي
سافرت ودري برجوعك ماترد وي عمـــــــتي
دنيا بويه بلايه شوفك تخنك الــــروح
وَمن رحت ليهسه كلبي معاشر اجروح
شو بطه ومارد علي
كتلي اوديلج علــــي
وين وعدك يالـــولي
الواعديته
******************************
( عقيل سلام الزيدي)
تعليقات
إرسال تعليق