قصائد حسينية مكتوبة
مشتاك ازور حسين هاي المسية
بعيوني دمعة شوك لابن الزجيه
===================
متعود انه حسين كله جمعه ازوره
بيدي اشبك الشباج واشتم عطوره
شما ظلمت دنياي يضويلي نوره
بترابه احني اشتاك جفين اديه
===================
مشتاك ازور حسين وابجي بحضرته
من ابجي يمه يطيب كلبي وحسرته
مو بيدي صار اشهور ما مره زرته
لو ابقه عنه بعيد جنهه المنيه
===================
هوه اني غير حسين شلي بحياتي
كون بضريحه تصير ساعة مماتي
ساعتهه حيل ارتاح واظمن نجاتي
بس كون ابو السجاد يعطف عليه
====================
مشتاك ازور حسين وبشوكي اكله
كلبي انعصر والشوك هد حيلي كله
من غيره والعباس عمري انه امله
ظلمة اصبحت والروح محتاجه ضيه
===================
ما ارهم ابلياه كل عمري هوه
ما عندي بالشدات بس هو سلوه
كلشي بحضرته يهون ماتبقه بلوه
عطشان اريد اليوم يرويني ميه
===================
ماظل صبر ياناس فايض حنيني
ابصحوتي وبالنوم ساكنهه عيني
لو ماكو بيهه حسين تذبل سنيني
وجروحي كلهه تطيب بالغاضريه
==================
الشاعر : حسين المحامي
تعليقات
إرسال تعليق