قصيدة : عاشق و قلبي الحنين

عاشق وقلبي الحنين الليلة ذايب
روحي مشتاقة لصوركم يالحبايب
🍁🍁🍁🍁🍁
وين  ما اكتب مشاعر القه صوره
(للعراق) الينبض احساس بشعوره
تغفه باحضانه النوارس من تزوره
موطن الاحرار والناس الغيوره
من عشق هذا الوطن ما قول تايب
روحي مشتاقه لصوركم يالحبايب
🍁🍁🍁🍁🍁
(للنجف) مشتاقة روحي وللزياره
ماتلمني القاع لو شفت المناره
يبقه (حيدر) بلسم قلوب الحياره
واستراحوا آدم ونوح بجواره
اضرحتهم فاقت السبعه العجايب
روحي مشتاقه لصوركم يالحبايب
🍁🍁🍁🍁🍁
قبة (حسين) الذهب واسع مداها
ناشر  جناحاته جبريل بسماها
تستحي النجمات لو شافت ضواها
من بعيد قلوبنا تحن لثراها
بيها دمعة زينب تخّضر مصايب
روحي مشتاقة لصوركم يالحبايب
🍁🍁🍁🍁🍁
نعم آيه من الوفه ( العباس) اشوفه
جعفر الطيار يستقبل اضيوفه
والفرات الفايض بغيرة جفوفه
عالقبر يندار كل يوم ويطوفه
ريت اويه النهر اوصل للاطايب
روحي مشتاقة لصوركم يالحبايب
🍁🍁🍁🍁🍁
كون أهيم وتنطوي الوديان إليه
و (للجوادين) اعتني بهاي المسيه
لاتلوموني بعشق اهل الحميه
روحي مشتاقةتزور (الكاظميه)
علمتني الدنيا من اشتاق اعاتب
روحي مشتاقة لصوركم يالحبايب
🍁🍁🍁🍁🍁
قصة (الكاظم) تظل قصة عجيبه
أنبياء  مامرت بهيجي مصيبه
يوسف انفك سجنه وتلاقه بحبيبه
(موسه) حتى اجنازته انشالت غريبه
دمعة المسجون تعثر بالنوايب
روحي مشتاقه لصوركم يالحبايب
🍁🍁🍁🍁🍁
روحي نجمة ليل واشتاقت للاحباب
شايل السامره لهفه ودمعة اعتاب
والنسايم من تمر وتحرك الباب
تلجم جروح القلب واتهيج الصواب
من اطب (حضرتهم) اتروح المتاعب
🍁🍁🍁🍁🍁
✒للشاعر : علي الخفاجي

تعليقات

المشاركات الشائعة من هذه المدونة

اجمل قصائد حسينية مكتوبة

قصيدة مثل طبع النسر طبعي مكتوبة

قصيدة براءة العشق مكتوبة