قصيدة فاركونه
📝قصيدة: فاركونه
✍الشاعر: محمد الجماسي
الجانو بوسط العيون فاركونه
من سفرهم هم يجون لو نسونه
آه يدمعي صب عليهم آه يدمعي صب عليهم
🟤🟤🟤🟤🟤
القاسمتهم فرحتي الشاركوني بسمتي
يبعد الهم لمن أشتم عطر إديهم
روحي مشتاكه وتحن وتارس إعيوني الحزن
بيدي شمعه بكلبي دمعه تواسي بيهم
الما ألكه مثلهم وين ما أمشي
لمن ضيعتهم ضيعت كل شي
لمن أيصير الغروب أفتقدهم
شمعة أسنيني تذوب من بُعدهم
كل حياتي بين اديهم آه يدمعي صب عليهم
🟤🟤🟤🟤🟤
البالكلب تركوا أثر والله يحنون الظهر
أنتظرهم وبصورهم بس أعاتب
أتوكلوا بالله ومشوا شمو أدموعي وبجوا
ربي يدري شكبره كسري أعله الحبايب
تره يموت الورد لو فارك الغيمه
عمت عيني عليهم ناموا بهيمه
أرد أحلفك يالتراب أبدمعة أمهم
أرحم بحال الشباب اليجري دمهم
بالدفن لا تكصي بيهم آه يدمعي صب عليهم
🟤🟤🟤🟤🟤
والله أموت من القهر من أكلب بالصور
ذكرياتي وأمنياتي كلها راحت
وبجنايزهم أسف بس أشييع للنجف
أوداعة الله يالحبايب روحي صاحت
هونك يا تراب المكبره أعليهم
لا تلجم جرحهم من تغطيهم
راحو بعمر الورود للمنيه
يمه عذريهم جنود المرجعيه
يلا رفعي الراس بيهم آه يدمعي صب عليهم
🟤🟤🟤🟤🟤
العودونه أعله الهجر الفاركونه أبلا عذر
يا صبرنه ويا كسرنه الماله جاره
أمتونه شتحمل بعد جم نعش بيهن صعد
يالنحبكم نرجو منكم بس بشاره
صلاة أمكم على السجاده بس دمعه
وظلت يم كبركم شايله الشمعه
ظلمه يا ناس الديار من بَعدهم
لخاطر أدموع الزغار ربي ردهم
وبعمرنا نشتريهم آه يدمعي صب عليهم
🟤🟤🟤🟤🟤
ذوله صارو يا زمن بسمه بشفاف الوطن
عنه غابوا وإستجابوا للعقيده
لمرجعيتهم وفوا وبالشهاده تشرفوا
وهالكرامه للنشامه مو جديده
حشد شعبي وحُسينيه هويتهم
على أركاب الزلم أدو تحيتهم
دمع ذكراهم يسيل بالنواظر
وشكثر دربج طويل يالمقابر
شمعه شايل من أجيهم آه يدمعي صب عليهم
تعليقات
إرسال تعليق