اجمل قصيدة عن صاحب العصر والزمان(عج)

كون صدفه ومره اشوفك
يمك ابقى وما اعوفك

واكعد احجيلك يغايب
مسامر اشواق وحبايب

امنيتي لو لحظه تمرني اعليك اطوف
اعمي كل عمري كضيته وبيك اشوف
ابجربت العباس احلفك والعلم ويه الجفوف
تعطف اعليه برحمتك طهر الكلب اللهوف

بالعشك مجنون ذايب
مسامر اشواق وحبايب

ارد اسألك عن همومك والحزن ياساعه يخلص
دمعك الغرك جفونك بالضهور يزيد ينقص
عمري بغيابك يعمري ماله قيمه وكله يرخص
فراكك الذوب مهجتي سيدي ضل بيه يمتص

زادت بروحي النوايب
مسامر اشواق وحبايب

تراب جدمك كون امسحه بالرموش وموبديه
ياحنين ومالي غيرك سيدي ويحن عليه
ارد اشاقيك واضحكك هذا عقلي وتدري بيه
لو رحت وياك اروحن يابو صالح انته اليه

بروحي يامهدينا كاتب
مسامر اشواق وحبايب

ياحبيبي ماتجيني قيمه ماضل لحياتي
تايه بكثرت ذنوبي وجيتك هيه نجاتي
عايش بدنيه غريبه خايف تغير صفاتي
خايف تقشمرني وانسى مجلسك واترك صلاتي

ومن تلاكيني تعاتب
مسامر اشواق وحبايب

ابقى احلم ماأبطل بلكي حلمي يصير مره
وافرح هواي بحياتي والضلام يصير كمره
الغايه من هاي امنياتي ماأريدن غير نضره
كلبي مايحمل غيابك مايهيد وطال صبره

ماترد يبن الاطايب
مسامر اشواق وحبايب

كريم الجياشي